તે ગૌણ બાબત છે -ભરત વિંઝુડા

સતત   ઘડિયાળના  કાંટા  ફર્યા તે  ગૌણ  બાબત છે
પળોના    મુડદાં  ટપોટપ  ખર્યા તે  ગૌણ  બાબત છે

છે   બાબત  બંધ   મુઠ્ઠીથી   ટપકતાં    ઝાંઝવાઓની
હથેળીમાં   કંઈ   રણ   વિસ્તર્યા   તે  ગૌણ બાબત છે

ઝીલી લે છે કે નહીં વાતાવરણમાં પડઘા અવાજોના
ખીણો   કંપી,   પહાડો   થરથર્યા તે   ગૌણ  બાબત છે

તમે  ક્યા  કારણોસર  સાંભર્યા  તે   મુખ્ય  બાબત છે
અચાનક-અણઅચાનક   સાંભર્યા તે ગૌણ બાબત છે

ખરેખર   મોરમાં   આશ્ચર્ય   જેવું   હોય  તો      -ટહુકો,
ને    એના   કેટલાં   પીછાં   ખર્યાં  તે ગૌણ બાબત છે.

-ભરત વિંઝુડા