If you can’t see Gujarati click here for help.

આ નભ ઝૂક્યું તે કાનજી
          ચાંદની તે રાધા રે,

આ સરવરજળ તે કાનજી
          ને પોયણી તે રાધા રે,

આ બાગ ખીલ્યો તે કાનજી
          ને લ્હેરી જતી તે રાધા રે,

આ પરવત-શિખર કાનજી
          ને કેડી ચડે તે રાધા રે,

આ ચાલ્યાં ચરણ તે કાનજી
          પગલી પડે તે તે રાધા રે,

આ કેશ ગૂંથ્યા તે કાનજી
          ને સેંથી પૂરી તે રાધા રે,

આ દીપ જલે તે કાનજી
          ને આરતી તે રાધા રે,

આ લોચન મારાં કાનજી
          ને નજરું જુએ તે રાધા રે !

-પ્રિયકાંત મણિયાર

મુખ્યપૃષ્ટ પર પરત